2015-04-18

లగ్నము – కుజుడు 1- 6

మేషలగ్నమునకు లగ్న అష్టమ అధిపతి అయిన కుజుడు 12 భావములయందు ఉన్నప్పుడు ఇచ్చు ఫలితములు .
లగ్నము నందు కుజుడున్న జాతకులు శౌర్య పరాక్రమములు కలవారు , ఓపిక సహనము తక్కువ . కొద్దిగా కోపస్వభావము ,చిరాకు కలిగి ఉందురు . వీరి శరీరము ఉష్ణ స్వభావము కలిగి ఉండును . సన్నగా ఉంటారు . ఎర్రని శరీర చాయ కలిగి , క్షత్రియ లక్షణము కలిగి ఉంటారు .

2 వ ఇంట అనగా వృషభము లో కుజుడున్న జాతకులకు భూముల వలన , వ్యవసాయము, పంటల ద్వారా ధన యోగము కలుగును . తాత , ముత్తాత ల ఆస్తులు , వారసత్వ ఆస్తులు కలసి వచ్చును . అట్లు లేకుండిన జాతకులు స్వతంత్రముగా ఆస్తులను గడింతురు . వీరు భూములపై పెట్టుబడి ( ఇన్వెస్ట్మెంటు) పెట్టుట మంచిది . వివాహ విషయములో కొంత ఆలస్యము జరుగును .

౩ వ స్థానము మిధునము అగుచున్నది . ఇది బుధుని రాశి . ఈ రాశి కుజునకు శత్రు క్షేత్రము . ఈ భావము సోదర , సోదరీలను సూచించు చున్నది . ఇక్కడ కుజుడున్న జాతకులకు అన్న తమ్ములు ఎక్కువగా ఉందురు కానీ . జాతకునకన్నా పెద్ద వారైన అన్నలకు నష్టము కలుగును . అన్న తమ్ముల మధ్య సరియైన ఐకమత్యము ఉండదు .

నాల్గవ స్థానము కర్కాటక రాశిలో కుజుడు నీచ స్థితి కలిగి ఉండును . ఇక్కడ కుజుడున్న జాతకులు గృహము నిర్మించిననూ ఏదో ఒక లోపముండును . సరియైన గృహ వసతి లేక పోవును . వీరు తల్లి తండ్రి పట్లకొంత వివక్ష కలిగి ఉంటారు .బంధువుల పట్ల గానీ ఇతరుల పట్ల గానీ కొంత ఈర్ష్య, అసూయ కలిగి ఉండు అవకాశమున్నది . స్వయంకృత అపరాధము వలన కొన్ని కష్టములను కొనితెచ్చు కొంటారు.

పంచమ స్థానమైన సింహ రాశి లో కుజుడు మిత్ర క్షేత్ర స్థితి కలిగిన వాడే అయినప్పటికీ . ఇది సంతాన స్థానము . ఇక్కడ కుజుడు ఉండుట వలన జాతకులకు సంతాన నష్టము కలుగును . స్త్రీలకు ప్రత్యేకించి గర్భ స్రావము కల్గుచున్నది . తొలి సంతానము నష్టము తప్పదు . లేక అబార్షన్ అవుతుంది. వివాహము జరిగిన తరువాత సంతానము కొరకు మెడికల్ ట్రీట్మెంట్ అవసరము . మందుల వాడకము తర్వాత సంతానము కలుగు సూచన ఉన్నది .ఇక్కడ గురు గ్రహ స్థితి బాగుంటే సంతానము వెంటనే కలుగుతుంది .

ఆరవ భావమైన కన్యారాశి కుజునకు శత్రు క్షేత్రము ఈ స్థానములో కుజుడున్న జాతకులకు అనారోగ్యము తప్పదు . రక్త సంభంద రోగములు వచ్చును , ఆస్తులు , భూములు మున్నగునవి కోర్టు వ్యవహారములలో ఇరుక్కుపోవును , తగవులను , పోలీసు కేసులను ఎదుర్కొన వలసి వచ్చును . ముఖ్యముగా కుజ దశా అంతర్ధశ సమయములలో పై ఫలితములు జరుగుతాయి .       

2015-04-07

లగ్నము – కుజుడు 7-12

లగ్నమునకు 7 ఇంట కుజుడున్న జాతకులకు వివాహము ఆలస్యంగా జరుగును. భార్యా , భర్త ఇద్దరూ ఒకరికి ఒకరు పంతాలు పట్టింపులకు పోవుదురు . వీరు తమకు నచ్చిన జీవితభాగస్వామిని స్వంతంత్రముగా ఎన్నుకొనలేరు.జీవిత భాగస్వామిని తమకు అనుకూలముగా మార్చుకోలేక ఇబ్బంది పడతారు .  

8 వ ఇంట కుజుడున్న జాతకులకు ఆయుస్సు బాగుంటుంది . వారసత్వ సంపద వృద్ది కలుగుతుంది .కానీ కుటుంబ సభ్యుల మధ్య ముఖ్యముగా ఆస్థి సంబంధ వ్యవహారములలో సమస్యలు ఎక్కువగా ఉంటాయి .

భాగ్య స్థానమైన ధనుస్సు లో కుజుడు మిత్ర క్షేత్ర స్థితిలో ఉన్నటువంటి జాతకులకు పితృ భాగ్యము , ఉంటుంది . కానీ జాతకులు యవ్వన సమయములో తండ్రికి కొంత ఆర్ధికపరమైన నష్టములు, శారీరక సమస్యలు , ఏర్పడతాయి . ఇక్కడ కుజుడున్న జాతకులు తండ్రికి మించిన తనయులు కాగలరు . విశేష కీర్తిని , పేరును సంపాదించి కుటుంబ గౌరవమును పెంచెదరు .

పదవ ఇంట మకరరాశి లో కుజుడు ఉచ్ఛ స్థాన గతుడై ఉన్నటువంటి గ్రహ స్థితి కలిగిన జాతకులు రుచక మహా పురుష యోగమును పొందుతారు . ఈ యోగ ప్రభావముచే జాతకులు సామాన్య కుటుంబమున జన్మించిన వారైననూ జీవితములో అత్యున్నత స్థానమును పొందగలరు . మంచి జీవన స్థితి ( ఉద్యోగము , వ్యాపారము , అధికారము ) ఏర్పడును . కానీ మధ్య , మధ్యలో కొన్ని ఒడుదుడుకులు ఏర్పడతాయి .వీరు స్వయంకృతాపరాధము వలన పౌరుషమునకు పోయి ఎంతటి పనినైనా ( అది డబ్బైనా కావచ్చు లేక ఉద్యోగమైనా కావచ్చు ) మధ్యలో విడచి పెడతారు .      .  

11 వ స్థానమైన కుంభ రాశిలో కుజుడు స్థితి యుండగా జన్మించిన జాతకులు భూముల వలన , సోదరుల వలన విశేషముగా లాభ పడుదురు . వీరికి సాధారణముగా బ్రతుకును గురించి చింత యుండదు . ఎల్లవేళలా ఏదో ఒక వ్యాపకముతో గడుపుతారు . సోదరుల ప్రోత్సాహముతో ఉన్నత స్థితికి చేరుతారు .భూ సంభంద వ్యవహారములలో బాగా కలసి వస్తుంది .

12 వ స్థానమైన మీనరాశి లో కుజుడు మిత్ర క్షేత్ర స్థితిని పొంది యుండగా జన్మించిన వారు దాన ధర్మములు ఎక్కువగా చేయుదురు . వీరు సుఖపడుట తక్కువ . పూర్వీకుల నుంచి సంక్రమించిన ఆస్థిని పాడు చేయుదురు . జీవితము యొక్క అంతిమ సమయములో కొంత ఆర్ధిక ఇబ్బందులను ఎదుర్కొంటారు . ముందు చూపు లేక పోవుట వలన డబ్బును వృధా వ్యయము గావించుట వలన అనేక కష్ట నష్టములు ఏర్పడును .

మేషరాశి

ద్వాదశ రాశులను బట్టి మానవుని జీవిత విశేషములను , మానవుల యొక్క గుణ గణాలను తెలుసు కోవచ్చని జ్యోతిష్య శాస్త్రవేత్తలు తెల్పి యున్నారు . మ...