జన్మ నక్షత్ర ఫలితము _ ఉత్తర

ఉత్తర నక్షత్రమున జన్మించిన వారు శాంత స్వభావము కలిగి ఉందురు . నిర్మలమైన మనస్సు కలవారు . తెలివైనవారు. ఆదర్శవంతమైన జీవితమును గడిపెదరు. సమాజ సేవకై పాటు పడతారు . ఉన్నతమైన ఆశయములు కలవారు . కల్మషము లేనివారు . మంచి విద్యావంతులు . విషయ పరిజ్ఞానము కలవారు . తొందర పాటు ఉండదు . నిదానముగా ఆలోచిస్తారు . బంధువులు , స్నేహితుల మధ్య పరస్పర సంభంధములు కలిగి ఉంటారు .

వీరిని అర్ధం చేసుకొనే జీవిత భాగస్వామి లభిస్తారు . తెలివైన , బుద్దిమంతులైన సంతానము కలుగుతుంది. వీరికి సునాయాస ధనయోగము కలుగుతుంది . సమాజమున పేరు, ప్రఖ్యాతలు లభిస్తాయి . గౌరవ మర్యాదలు పెరుగుతాయి . ఇతరులకు సహాయ పడుదురు . కుటుంబ భాధ్యతను నిర్వహించుటలో మంచి సమర్ధత కలవారు . ముందు చూపు కలవారు . కుటుంబ సభ్యులలో ఎవరికీ ఏది అవసరమో ముందే తెలుసుకొని దానికి అనుగుణముగా ఏర్పాటు చేయుదురు .

సాధు స్వభావులు . పరుల హితమునకై పాటు పడతారు . అందరూ సుఖముగా ఉండాలని కోరుకొంటారు . ,వీరికి స్వలాభాపేక్ష ఉండదు . సహృదయులు . తన స్వంత తెలివి తేటలతో జీవితమున అభివృద్ది సాధించ గలరు . అన్ని విధాలా ఆలోచించి గానీ నిర్ణయము తీసుకోరు . మంచి , చెడులను విచారించి ముందడుగు వేస్తారు . వీరు కుటుంబ యజమానిగా గానీ , లేక చిన్న చిన్న సంస్థలకు అధిపతులుగా గానీ బాగా రాణిస్తారు . క్లిష్టపరిస్థితులు ,క్లిష్ట సమస్యలు ఏర్పడినపుడు చాలా చాకచక్యముగా వ్యవహరించగలరు .

నలుగురునీ కలుపుకొనుపోవు మనస్తత్వము కలవారు , గొడవలు , తగవులకు దూరముగా ఉంటారు . ఉద్రేకము ఉండదు . సమయోచితముగా సందర్భమును బట్టి పరిస్థితులకు అనుగుణముగా ఇమిడి పోతారు . ఘర్షణ , వాదోపవాదములు వీరికి ఇష్టము ఉండవు . ఇతరులకు హాని కలిగించే విధముగా ప్రవర్తించరు . వీరికి స్త్రీ వాంఛ అధికముగా ఉండును. గృహము నందు ప్రశాంతతను కోరుకుంటారు . దైవభక్తి కలవారు . మంచి వాక్పటిమ కలిగిన వారు. అనర్గలముగా మాట్లాడగలరు .

ఇతరుల మనసునెరిగి ప్రవర్తింతురు . మంచి ఉపన్యాసము చేయగలరు . దీర్గ కాలములో జరగబోవు మంచి చెడుల గురుంచి ముందే ఊహించగల  మేధావులు . మంచి ప్రణాలికా బద్దముగా నడచుకొంటారు . ధనముతో పాటు కుటుంబము , భాద్యతలు , స్నేహితులు , బంధువులు , నీతి , నిజాయితీలు అన్నింటికీ విలువనిస్తారు . మొత్తం మీద వీరి జీవితము చాలా సుఖముగా ఆనందముగా సాగుతుంది .