జన్మ నక్షత్రము _ హస్త

హస్త నక్షత్రమున జన్మించిన వారు ఓర్పు సహనము అధికముగా కలవారు . శాంతము వహింతురు . నిదానముగా ఆలోచిస్తారు .ప్రణాలికా బద్దముగా వ్యవహరిస్తారు . సున్నిత మనసు గలవారు . ఆప్తులను ఆదుకొందురు . స్నేహితులు ఎక్కువగా ఉంటారు . వీరికి నచ్చని విషయములను నిర్మోహమాటంగా వ్యతిరేకించెదరు . మొండి తనము కలవారు . ఎన్ని కష్టములు ఎదురైనా భయపడరు . ఓర్పుతో సాధించుకొంటారు .

వీరు ఫలితమును ఆశించక తమ పని తాము చేసుకొని పోతారు . కష్టే ఫలీ అను సూత్రమును నమ్ముతారు . తాము నమ్మిన సిద్దాంతములకు కట్టుబడి ఉంటారు . ఇచ్చిన మాట తప్పరు. ఉదార స్వభావము కలవారు . పేదవారిని ,బీద వారిని ఆదు కొందురు . దయార్ద్ర హృదయము కలవారు . సాధారణముగా వీరు పిత్రార్జితమును కలిగి ఉందురు . అట్లు లేకున్నా వీరు స్వార్జితముగా అభివృద్ది లోనికి వస్తారు .

బాల్యమున కొద్ది రోజులు అనగా రాహు మహాదశా సమయములో కొన్ని కష్ట నష్టములను ఎదుర్కొంటారు . అనంతరము వీరి జీవితము సుఖముగా సాగుతుంది . వీరికి వివాహమూలమున జీవితభాగస్వామి వలన భాగ్యము వృద్ధి చెందును . వివాహ అనంతరము మంచి సుఖమయ జీవితమును గడిపెదరు . స్త్రీల పట్ల మమకారము ఎక్కువగా ఉంటుంది . స్త్రీ వాంఛ అధికము . వీరికి పురుష సంతతి ఎక్కువగా ఉంటుంది . మంచి సంతానము కలుగుతుంది .

ఆచార సంప్రదాయముల పట్ల మక్కువ కలిగి ఉంటారు . సంగీత సాహిత్య రంగములలో ప్రవేశము ఉంటుంది . ఇతరులకు చేతనైతే ఉపకారము చేయుదురు కానీ అపకారము తలపెట్టరు.  ఎప్పుడూ ఏదో ఒక వ్యాపకముతో ఉంటారు . కాలాన్ని వృధా చేయరు .మంచి ఆకర్షణీయ రూపము కలిగి ఉందురు . వయస్సు తక్కువైనా చూచుటకు పెద్దవారి వలె కన్పింతురు .మధ్యవర్తిత్వము చేయుటకు బాగా పనికి వస్తారు . ఈ నక్షత్రమున జన్మించిన వారిలో ఎక్కువ మంది స్వతంత్రజీవనమును కోరుకొంటారు .

అప్పజెప్పిన పనిని భాద్యతగా నిర్వహింతురు . నలుగురిని కలుపుకొనుపోవు లక్షణము కలవారు . మాయామర్మములు తెలియని వారు. ఆనందమైనా , భాదనైనా ఒకేలా స్వీకరిస్తారు . సభల యందు మాటలాడలేరు . కుటుంబ బరువు భాద్యతలలో భాగస్వాములవుతారు . గౌరవ మర్యాదలను పొందుతారు . మధ్య వయసు నుండి వీరి జీవితము అంచెలంచెలుగా ఉన్నత స్థితికి చేరుతుంది . మంచి విద్యా వంతులు , భోగ భాగ్యములను అనుభవించువారు. ఏ పనినైనా ఇష్టముగా చేయుదురు .