జ్యేష్ట నక్షత్ర ఫలితము

జ్యేష్ట నక్షత్రములో జన్మించిన వారు చక్కగా మాట్లాడెదరు . సమయ స్పూర్తి కలిగినవారు . పెద్దల పట్ల గౌరవ మర్యాదలు కలవారు . భాగ్యవంతులు . ఈ నక్షత్రమున పుట్టిన వారిని వివాహమాడిన జీవిత భాగస్వామి అన్నలకు (బావ గారికి, మరియు బావ మరిది  ) ( ఈ విషయములో స్త్రీలు అయితే భర్త అన్నలకు , పురుషులు అయితే బావమరిది భార్య అన్నగారికి ) దోషమని యున్నది .  అలాంటప్పుడు ఏకైక సంతానము కలవారికి గానీ , అన్నలు లేనటువంటి వారు అనగా తొలుచూరు సంతానము గా జన్మించిన వారికి కానీ ఇచ్చి వివాహము చేయుట వలన పైన చెప్పిన దోష ప్రభావము నుండి తప్పించు కొనవచ్చును .

అయితే జ్యేష్టులకు వివాహము చేయరాదని కూడా శాస్త్రములలో చెప్పబడి యున్నది కదా ? ద్వి జ్యేష్ట వలన వివాహమునకు ఆటంకము కలుగదు . కాకపొతే జ్యేష్ట మాసములో వివాహము చేయరాదు . త్రిజ్యేష్ట పనికిరాదు.

ఇక రెండవ విషయము జ్యేష్ట నక్షత్ర మొదటి పాదములో జన్మించిన వారికే పైన తెలిపిన దోషము వర్తించు చున్నది . మిగతా 2 ౩ 4 పాదములలో పుట్టిన వారికి వర్తించుట లేదు . కావున విషయములను జాగ్రత్తగా గమనించగలరు .

ఈ నక్షత్రమున జన్మించిన వారు వివాహము చేసుకోదలచిన భాగస్వామి ( life partner )కుటుంబములో మొదట ఆడపిల్ల జన్మించి ఉంటే తరువాత పుట్టిన వారిని వివాహము చేసుకొనుట వలన కూడా పైన తెలిపిన దోషము వర్తించదు . ఈ విధముగా కొన్ని ప్రత్యామ్నాయములను అనుసరించుట వలన శాస్త్రములలో చెప్పబడిన దోష ప్రభావములనుండి రక్షణ పొందగలము .

ఈ నక్షత్ర జాతకులు చాలా జాగ్రత్తగా ఉంటారు . ఓర్పు సహనము కలవారు . మాయా స్వభావము వీరికుండును . అసత్యములను పలుకుటకు వెనుకాడరు . స్తోమత కలవారు , సంఘము నందు పెద్ద మనుషులుగా చెలామణి అగువారితో స్నేహము చేయుదురు . కామవాంఛ అధికముగా ఉండును. ఎప్పుడూ సంతోషముగా ఉండాలని కోరుకొంటారు . భోగములను అనుభవింతురు. వీరు స్వంతత్రముగా జీవితమున అభివృద్ది సాధించ గలరు . అహంభావము కలవారు .

విద్వాంసులు . ఉత్సాహ వంతులు . ఏ పని చేయుట కైనా వెనుకాడరు . లౌకికము తెలిసిన వారు . వీరు ఎక్కువగా ఋణములు చేయుట మంచిది కాదు . సర్వ సమర్దులే కానీ ఋణ ఒత్తిడులు పెరుగుటచే కొంత కష్ట నష్టములను ఎదుర్కొను అవకాశమున్నది . ధన విషయమున ప్రత్యేక జాగ్రత్త అవసరము .